有時候在家煮食,誤打誤撞會煮到一尾有餐廳級水準的菜,然後就會開心成晚 — 這是種師奶獨有的快樂。✌🏼️😁

今晚得到幸運之神眷顧,煮了一餐被老公評為高級餐廳級別的意粉。Yeah yeah yeah!  👯👯

原本打算煮的是 Spaghetti alla Carbonara,點知家裏沒有煙肉,但外面下大雨,唔想外出買。摷摷雪櫃,見有一包和牛漢堡扒,心想不如用它代替煙肉吧,橫掂都係肥仔嘢。於是就攞出來解凍,準備試整 Spaghetti alla Wagyu Beef 嘞。白汁襯牛有點怪,但效果出奇地好。👍🏼

我其實好怕煮意粉,又驚佢過熟又驚佢未熟,煮完又要「瓊」乾水,又怕佢黐埋一舊。近來睇咗好多 cooking channels 的影片,發覺好多日本廚師都會將意粉直接倒入汁度煮腍。(唔知係咪西式同日式的分別🤔)所以我就試吓嘞,出嚟的效果好到不得了!點解我唔早幾年知呢個方法呢?😭😭

唔好講咁多,食譜如下:

材料:(三至四人份)

和牛漢堡扒兩份

白蘑菇八至七粒(切片)

洋蔥半個(切粒)

乾蔥一粒(切碎)

蒜頭三瓣(切碎)

意粉120克

Parmesan Cheese 一杯(刨細)

雞蛋一隻(打成蛋汁)

鮮奶 400 毫升

鹽、黑椒、洋莞茜(Parsley)適量

 

步驟

1)先將和牛漢堡扒搗壓爛,再加鹽、黑椒與洋莞茜醃一陣。(此時可以切其他材料)

2)落少少油起鑊,先爆香蒜粒,再落醃好的免治和牛炒香至七成熟。撈起備用。
 

3)用同一鑊,將洋蔥、乾蔥與蘑菇片同炒至軟身。過程中可落少許鹽和黑椒吊味。 

 

4)待蘑菇差不多熟透便可加先前炒好的免治和牛同炒香。此時試吓味,唔夠鹹就落多點調味。


5)倒進鮮奶,煮至滾。(係,好油,我知)

  

6)意粉比較長,個鑊唔夠大就將意粉折開一半,食都容易D。

  

7)我這隻鑊有黐底的前科,所以要不時攪拌。當開始收汁,意粉都應該剛好煮好。

  

8)熄火。將 Parmasan cheese 與蛋汁倒進意粉撈勻。(☝🏼️同 Carbonara 同一道理,一定要熄火後先做呢個動作,如果唔係雞蛋會變熟蛋,而且要快速撈,如果唔係蛋汁依然會水汪汪的)

  

9)撈完會變咗咁。 

  

10)上碟再加少少新鮮 Parmesan cheese 同 Parsley,靚仔影張相。✌🏼️😎

這個意粉真係好食到不得了,但亦好「漏」,食得太多會幾濟;建議整個沙律中和返。(我整咗蘋果沙律🍎🍎)

文:Ms Yu,八十後教師,相信一切源自教育。也信美食令人快樂。😊

相關連結:

其他食譜
   

Advertisements